Mir alli
Copyright Marianne Schauwecker
En alte Maa und es paar lääri Fläsche,
ungwäschni, alti Hose mit me Fläck.
Es nasses Naastuech lampet us de Täsche,
de Tschoope hät es Loch und schtarrt vor Dräck.
Siin Blick isch schtumpf und glaasig und nöd vo dere Wält,
zu siine Füesse liit en graue Huet.
Es fählt em für's nächscht Glaas halt nones bitzli Gält,
er waartet bis em öpper e Münze ine tuet.
Refrain:
Au er isch `mal es Chind gsii, so nöi und fiin und chlii,
und siis Läbe, siini Zuekumft sind no offe gsii.
Wär därf werte, d'Nase rümpfe - über es Läbesgschick?
Isch nöd das, was öis unterscheidet, ganz eifach - Glück?
Sie schtaht alleige deet im Shopville une, -
e dünni Gschtalt im schmudelige Chleid.
Verfilzti Haar und Löcher i de Schuene, -
paarne Passante tuet sie fascht chli leid.
Doch isch es Schtoff, nöd Mitleid, wo sie jetzt dringend bruucht,
sie pumpt verzwiiflet all Passante-n-aa.
Die meischte winked ab: "Gwüss nöd für so-n-e Sucht!
Die söll - wie miir - go schaffe, antschtatt fuul umezschtah!"
Ref.
Au sie isch `mal es Chind gsii, so nöi und fiin und chlii,
ihres Läbe, ihri Zuekumft sind no offe gsii.
Wär därf wärte, d'Nase rümpfe - über es Läbesgschick?
Isch nöd das, was öis unterscheidet, ganz eifach - Glück?
Doch was heisst "Glück" bim sogenannt "Normaale",
wo iizwängt isch i siini Läbesnorm?
Wo meint, die ängscht und all die Seelequaale,
das ghör' dezue und sigi ganz konform....
Keis Wunder, dass es Lüüt git, wo d'Sichrig durebrännt,
dass mänge sich nüm sälber hälfe cha.
Es isch en schmaale Pfad, wo öis vom Chranke trännt,
e Garantie uf Gsundsii cha kein im Läbe haa.
Ref.
Mir alli sind `mal Chind gsii, so nöi und fiin und chlii,
öisers Läbe, öisi Zuekumft sind no offe gsii.
Kein söll werte, d'Nase rümpfe über es Läbesgschick.
Mir sind doch alli uf de Suechi - nach öisem Glück.