Us em Schnäggehuus
Copyright Marianne Schauwecker
Ich wohne ime Schnäggehuus,
mir fählt de Muet zum Läbe duss,
well alls so chalt isch und so fremd.
S'isch äng bi miir und nöd grad hell,
ich schlaafe an're gschützte Schtell
und hoff, dass all in Rue mich lönd.
Chrüüch emale us diim Huus,
und schtreck diini Fühler us,
pack dis Härz mit beidne Händ
und verlah di sichre Wänd.
Sicherheit isch Illusion,
zahlsch defüür en hööche Lohn,
wänn di andre uf dich schtönd,
well's dich nöd gsehnd.
Ich bin es Schaaf imene Schtall,
min gröschte Wunsch isch, dass mich alli
gäärn händ, drum bini lieb und braav.
Ich folge, ränn de-n-andre nah,
s'wäär schlimm, allei im Läbe z'schtah,
vill z'gfährlich für sones chliises Schaaf!
Hör uuf, Schaaf z'sii, wird en Mänsch!
S'isch vill schöner, als du tänksch!
Pack dis Häärz mit beidne Händ
und verlah di sichre Wänd.
Sicherheit isch Illusion,
nume Braavsii monoton,
'mal öppis waage bringt vill meh,
du wirsch es gseh!
Ich bin es Huen, drum gacker ich
wie andri Hüener wacker, ich
suech Chörner und lege braav mis Ei.
Di andere, die wänd's esoo,
ich pass miich aa, lauf nie devoo,
und zur Belohnig bin ich nie allei.
Gackere im Hüenerdräck
isch doch gwüss kän Läbeszwäck!
Nimm dis Häärz i beidi Händ
und verlah di sichre Wänd.
Sicherheit isch Illusion,
find de Muet zum eigne Ton
und mach der druus en eigni Melodie!