D'Familiemisäre
Copyright Marianne Schauwecker
Känned ihr ächt au die Märe
vo de Familiemisäre?
Dicki Luft und muffigi Atmosphäre,
me tuet sich gägesiitig s'Läbe-n-erschwäre,
es isch e sonen Sunntig, en graue und lääre,
s'ret keine me normal, s'tüend alli nu chäre!
E Familie wie us em Bilderbuech!
So seit öise nette Sunntigsbsuech:
reizendi Eltere, reizendi Chind!
Wänn dä wüsst, wie mir vo Ziit zu Ziit sind!
Mir sind e Horde vo Hyäne,
wo sich zerfleischt bis zu de Träne,
mir sind e Gruppe wildi Leue,
wo schtriitet wie-n-e Herde Säue,
ein jede wott meh Rächt und Power,
ein jede fint, er sigi schlauer.
Ja, villicht känned ihr die Märe,
vo de Familiemisäre!
Jede wott de anderi dominiere,
ein jede wott dä sii, wo därf dirigiere,
und jede wollt sin Wille dureschtiere
und fint: das isch doch klar, - die sölled pariere!
Ja, sone Familie isch halt fein,
am allerschönschte isch's diheim!
Liebi, Geborgeheit, Harmonie, -
Gebrüll und Ärger und Hyschterie!
Mir sind e Horde vo Hyäne,
wo sich zerfleischt bis zu de Träne,
mir sind e Gruppe wildi Leue,
wo schtriiitet wie-n-e Here Säue,
zum Tüüfel mit dem Krach und Gwimmel!
Wär ich doch hie und da en Single!
Das isch si gsii, die schöne Määre,
vo de Familiemisäre....