Fitnessblues
Copyright Marianne Schauwecker
Hüt isch me-n-elastisch
und schportlich-jazzgymnastisch,
näbscht "Afro" macht me Stretching
und Jogging gäg de Pudding.
Es heisst: wär raschtet roschtet,
drum raast me loos - und poschtet
es Fitness-Gräät, chli Vitamiin,
me überwacht `s Choleschteriin,
isst nur no Kleie-Flöckli-Müesli,
höchschtens no salzlooses Gmüesli.
De wichtigscht Mänsch im Huus isch d'Waag,
me konsultiert si jede Taag.
Mit iire schtaht und fallt jetzt d'Luune,
's heisst: Zeiger dobe - Luune dune!
Und schtatt ir Beiz Spaghetti z'bschtelle,
tuet me nu Kalorie zelle,
trinkt höchschtens maal es Mineraal,
es Coci light mit "minical".
Also churz gseit: miir isch das z'hektisch!
Das isch nöd gsund, - dasch anorektisch!
Ich ghei 's Fitnessvelo in Chäller,
ich gang id Beiz und bschtelle-n-en Täller
voll roote, saftige Spaghetti,
und - Sie! - dänn no es Coci wetti!
Und zwar nöd "light", Sie! - sondern "mit"!
Ich wünsch en guete-n-Appetit!