Irgendwo
Copyright Marianne Schauwecker
Irgendwo rännsch i de Wältgschicht ume
und frägsch di mängisch, warum d'so rännsch.
Rotiersch im Chreis ringsume
und bisch doch eifach nume
unter Milliarde - ein chliine Mänsch.
Wottsch fatalistisch
dir eifach säge,
dass d'uf de Wält bisch
sig doch vergäbe.
Und trotzdem suechsch en Sinn,
wo d'chönntisch gseh dadrin,
nur en ganz ein chliine Sinn
irgendwo, irgendwo...
Irgendwo trüllsch als es chliises Redli
zmitzt im Getriibe vo dere Wält.
Singsch als säb chliine Redli
au mit im Wältgschicht-Medley,
bis s'Abschiedsglöggli für diich dänn schällt.
Als wäärsch e Gufe
bisch schnäll verschwunde,
im Wält-Höihuufe
wirsch nüme gfunde.
Und trotzdem gisch nöd uuf,
suechsch bis zum letschte Schnuuf
nach diim ganz eigne Sinn
irgendwo, irgendwo.....
Irgendwo hät's au vo diir paar Schpuure.
Und wänn du dänksch, s'göng doch alls verbii,
tüend diini chliine Schpuure
trotzdem no wiiterduure,
s'isch gwüss nöd alles vergäbe gsii.
Suechsch nach de Schtäärne,
dänn chlappts nie richtig.
Du söttisch läärne,
du sälber bisch wichtig.
Du, - grad eso wie d'bisch,
mit allem wo du gisch,
bisch en chliine Teil vom Sinn
uf dere Wält, uf dere Wält...
uf dere Wält.