Lampefieber
Copyright Marianne Schauwecker
Schrecklich, - - wie die alli lueged!
Und ich sött jetzt es Schtändli bringe...
's Gmurmel hät sich scho beruhiget,
die warted druf, dass ich jetzt singe!
Mini Finger sötted zupfe!
Hüt gaht's nöd, sie sind uns Schtei!
Sie chönd nu a de Saite rupfe, - -
ich gang glaub gschiider wieder hei!
Andrersiits bin ich ja würkli blöd, -
was chan dänn eigentlich scho schlimms passiere?
Entweder gfallt's 'ne - oder dänn halt nöd!
Ich mues debii doch gar nöd vill riskiere!
Es chan halt würkli niemert allne gfalle,
d'Wält gaht nöd unter, wänn ich durefalle.
Warum hockt mir dänn so'ne blödi Angscht im Gnick?
Me gaht nöd unter wäg'ere Kritik!
Würd ich nume nöd so schlottere,
chönnt's eventuell scho glinge.
Doch mit em Schlotter chunnt au 's Schtottere, -
und schtotternd cha'me halt nöd singe!
Usserdem han ich au Schiss,
wänn ich mini Songs sött bringe,
dass ich d'Schtrophe-n-all vergiss!
Händ ihr's doch guet, ihr müend nöd singe!
Andrersiits han ich's so welle ha, -
'S hät niemert gseit, ich müesi Lieder dichte!
'S hät niemert gseit, ich mües e Show ablaa!
Ich chönnti also grad so guet verzichte.
Doch händ so Lieder halt es eignigs Läbe,
wänd nöd a mir alleige bliibe chläbe,
wänd plötzlich furt und use und zu andre gah...
drum ebe hock ich blöderwiis jetzt da!
'Ch mues es jetzt grad nomal säge,
mir gaht's im Augeblick chli schitter,
'ch bi uufgregt, und ich bi verläge,
und mini Hand, die hät de Zitter!
Ich gschpüüre so'nes komischs Wüele
i mim Hals und i mim Buuch,
söll i lache oder brüele? - -
oh, Heimatland, isch's mir jetzt gschmuuch!
Andrersiits bin ich ja sälber tschuld,
s'hät mich ja ebe niemert welle zwinge!
Und doch - ich bitt um no-n-es bitz Geduld:
No paar mal schlucke, und ich fang aa singe!
Warum die Angscht wäg so paar chliine Lieder,
's heisst: "Wo man singt, da lass dich ruhig nieder".
'S git grösseri Problem uf dere Erde da!
Drum fang ich ändlich aa!